ດັງປະສານກັບສຽງ ແກວ່ງໄກວຂອງໃບໄມ້
ສາຍລົມມັນໂຊຍໃຫ້ ໜາວກາຍໃຈວາດໃດໜຶ່ງ
ມາລາໃຈ ນາງນັ່ງຊຶ້ງ ຄຳນຶງເລື້ອງທີ່ຜ່ານມາ
ພາບສາຍຕາທີ່ອ່ອນຊ້ອຍ ຍັງຝັງເລິກຢູ່ໃນໃຈ
ນາງບໍ່ມີເວລາໃດ ຊິເລົ່າລືມລົງໄດ້
ນາງຄິດເຫັນໃບໜ້າ ແວວຕາທີ່ຫວານຊໍ່າ
ກັບຖ້ອຍຄຳກ່າວເວົ້າ ໃນມື້ທີ່ພົບກັນ
ຂ້ອຍຮູ້ດີວ່າເຈົ້ານັ້ນ ເວົ້າຢ່າງຈິງໃຈ
ພ້ອມຍິ້ມໄຂໄມຕີ ຕໍ່ເຮົາຢ່າງຫວານຊ້ອຍ
ເຈົ້າກ່າວຈາກັບຂ້ອຍ ຫວານໆບອກມາວ່າ
“
ຖ້າຂໍ້ໃດແກ້ບໍ່ໄດ້ ໃຫ້ຕົວຂ້ອຍຊ່ວຍເດີ
“
ຂໍ້ສະເໜີຂອງເຈົ້າ ຂ້ອຍປຶ້ມປ່ຽມດີໃຈ
ແຕ່ວ່າໃນສັກສີ ທີ່ແຂ່ງຂັນກັນນັ້ນ
ມັນເໝືອນຄຳຫຍັນຫຍໍ້ ຫຍາມເຮົາເຈົ້າຮູ້ບໍ່
ຂ້ອຍກໍ່ພ້ອມຮຽບຮ້ອຍ ຈຶ່ງມາກ້າເຂົ້າແຂ່ງຂັນ
ຂ້ອຍຍອມຮັບວ່າມື້ນັ້ນ ຂ້ອຍຄຽດເຄັ່ງໃຈຈິດ
ຂ້ອຍຄິດພຽງໃນໃຈ ໃຫ້ຄະແນນກາຍເຈົ້າ
ແລ້ວຕົວເຮົາຈະໄປເວົ້າ ຫວານໆເຍີ້ຍວ່າ
“
ແຜ່ເມດຕາແນ່ເຈົ້າ ຕົວເຮົາແກ້ບໍ່ເປັນ
“
ພໍໄດ້ເຫັນຄະແນນແລ້ວ ຂ້ອຍອິດອ່ອນແຮງໃຈ
ຂ້ອຍໄດ້ເປັນອັນດັບສອງ ຜູ້ທີ່ຮອງຖັດເຈົ້າ
ເຮັດໃຫ້ເຮົາເຫງົາເສົ້າ ບໍ່ສົມໃຈຫວັງຕໍ່
ໂອກາດລໍຊິເຍີ້ຍເຈົ້າ ຄົງໝົດແລ້ວລະໜໍ
ເມື່ອເຫັນເຈົ້າຍິ້ມຕໍ່ຂ້ອຍ ຢ່າງຊ້ອຍຊື່ນສຸກສັນ
ສິ່ງນັ້ນມັນເໝືອນໄຟສຸມ ໄໝ້ໃນອຸລາຂ້ອຍ
ເໝືອນເຈົ້າຄອຍໄຂຍິ້ມ ຫຍາມເຮົາທຸກບາດຍ່າງ
ແຕ່ບໍ່ມີທາງອື່ນເວັ້ນ ຕົວຂ້ອຍຕ້ອງຍ່າງໄປ
ເຈົ້າຮູ້ບໍໃນໃຈຂ້ອຍ ມັນຮ້ອນຍິ່ງໄຟເຜົາ
ເມື່ອຕົວເຮົາເດີນນຳຫຼັງ ຢຽບບາດຕີນຕົວເຈົ້າ
ເຈັບໃຈເດທີ່ເຮົາໄດ້ ເປັນຮອງຕ້ອງເສຍທ່າ
ພາບບາດຕາເມື່ອເຈົ້າຍິ້ມ ເໝືອນເຍີ້ຍເອີ່ຍໃສ່ໃຈ
ແຕ່ເມື່ອເຈົ້າຫອມດອກໄມ້ ຢູ່ໃນຊໍ່ທີ່ເຮົາຖື
ຄືມີແຮງບັນດົນໃຈ ເຮັດໃຫ້ເຮົາລືມຄວາມແຄ້ນ
ຊາຍທີ່ຈະເປັນແຟນຂ້ອຍ ໃນໃຈຫວັງໄວ້ວ່າ
ຕ້ອງຮັກສາດອກໄມ້ ທີ່ເຮົາໄດ້ປູກມັນ
ເຮັດໃຫ້ຕົວຂ້ອຍນັ້ນ ຍິ້ມຢ່າງອາຍໆ
ຂ້ອຍປ່ອຍສາຍຕາແນມ ຊໍ່ດວງມາລາໄມ້
ພ້ອມຄິດໃນໃຈຂ້ອຍ ເຂົາດົມດອກໃດນໍ່
ຂ້ອຍຕ້ອງເກັບຫໍ່ໄວ້ ຄຽງຂ້າງຄູ່ໝອນ
ກ່ອນຈະນອນແຕ່ລະມື້ ຂ້ອຍຕ້ອງຜີ່ອອກມາດົມ
ແລະເປີດຊົມຕອນມືນຕາ ເມື່ອຕື່ນມາຍາມເຊົ້າ
ເຮົາຈະເກັບມັນໄວ້ ເປັນຂວັນໃຈຢ່າງຮັກຮໍ່
ເໝືອນໄດ້ພໍ້ໜ້າເຈົ້າ ຄຽງຂ້າງຄູ່ສູ່ວັນ
ເຈົ້າຮູ້ບໍ່ໃນມື້ນັ້ນ ໃຈຂ້ອຍຢູ່ບໍ່ເປັນສຸກ
ທຸກເວລາທີ່ແນມຊົມ ຊໍ່ດວງມາລານັ້ນ
ຂ້ອຍຕ້ອງສຸກສັນຍິ້ມ ລະເມີໃຈຊ້ອຍຊື່ນ
ແລະຮູ້ສຶກຕື່ນເຕັ້ນ ເມື່ອເຫັນເຈົ້າຍິ້ມສົ່ງມາ
ແຕ່ແລ້ວ ສາຍຕາຂ້ອຍຕ້ອງນິ້ງ ເມື່ອເຈົ້າຍື່ນບຸບຜາ
ໃຫ້ກັບ ສຸມາລີ ທີ່ນັ່ງແນມຢ່າງໃຈຊ້ອຍ
ຮູ້ບໍ່ຕົວຂອງຂ້ອຍ ຂີນຕາເອົາແທ້ວ່າ
ໃນເວລາທີ່ເຈົ້າ ສຳອອຍເວົ້າຕໍ່ນາງ
ດ້ວຍທ່າທາງອິ່ນອ້ອຍ ຊ້ອຍຊື່ນສຸດແສນ
ຂ້ອຍແໜ້ນເດຊວງອົກ ເມື່ອລໍ່າແຍງສອງເຈົ້າ
ເຮັດໃຫ້ຕົວເຮົານັ້ນ ເຈັບໃນໃຈວາດໃດໜຶ່ງ
ຄວາມຫຶງຫວງຕໍ່ເຈົ້າ ເລີ່ມມີຂຶ້ນທີ່ໃຈເປັນຕົ້ນຍາມຂ້ອຍໄດ້ ເຫັນເຈົ້າຊື່ນສົບຕາ
ຢອກລໍ້ກັບ ສຸມາລີ ຍິ່ງແສບໃນຫົວໃຈຂ້ອຍ
ສາຍຕາເຮົາຄອຍຈ້ອງ ແນມເຫັນໃຈດິ້ນດ່າວ
ຄວາມຮູ້ສຶກສຸດປວດລ້າວ ແສນເສົ້າໂສກມະໂນ
ຄວາມໂມໂຫໃນໃຈຂ້ອຍ ຮ້ອນຍິ່ງກວ່າໄຟເຜົາ
ມັນຮູ້ສຶກເໝືອນຕົວເຮົາ ຖືກພວກເຂົາຫຍາມເຍີ້ຍ
ຂ້ອຍຢາກເຜີຍຫົວໃຈເສົ້າ ເຂົ້າໄປຫາແລ້ວບອກວ່າ
‘ ຂ້ອຍຂໍມານັ່ງຂັ້ນ ສອງເຈົ້າຢູ່ຫວ່າງກາງ
’
ຂ້ອຍຈະວາງຕົວກັ້ນ ຂວາງຢູ່ບໍ່ໄປໃສ
ແຕ່ກໍ່ໄດ້ພຽງຄິດ ບໍ່ອາດທຳລົງໄດ້
ເກັບເອົາຄວາມເສຍໃຈເສົ້າ ລົງຊວງໃຫ້ແໜ້ນອັ່ງ
ກາຍເປັນຄວາມຄັ່ງແຄ້ນ ໃຫ້ເຮົາມຸ້ງຊະນະນາງ
ຄວາມຫວັງຕ່າງໆນັ້ນ ເລີ່ມຄິດໃນສະໝອງ
ຄວາມສົມປອງໃນຄວາມຮັກ ເລີ່ມເກີດມີໃນໃຈຂ້ອຍ
ໃຈຄິດຄອຍໄປເຖິງມື້ ງານວິວາກິນດອງແຕ່ງ
ຊາຍຂວັນແພງນັ່ງຂ້າງ ພວມປ້ອນໄຂ່ຂາວ
ໂດຍມີຄົນປວດລ້າວ ຍິງຊື່ ສຸມາລີ
ນັ່ງໄຮ້ຄວາມສຸກຂີ ຫຼັ່ງລິນນໍ້າຕາຍ້ອຍ
ໄດ້ພຽງຄອຍແນມໜ້າ ໝົດປັນຍາໄດ້ຄອງຄູ່
ສິ້ນສຸດສິດໄດ້ຢູ່ຫ້ອງ ຮຽງຊ້ອນເສື່ອດຽວ
ໝົດສິດໄດ້ກອດກ້ຽວ ອ້ອນອິ່ນສະເໜຫາ
ທຸກວັນອຸລາໝອງ ເສົ້າຊວງບໍ່ວາຍເວັ້ນ
ກາຍເປັນຍິງຄົນເສົ້າ ເຫງົາຊວງບໍ່ຮູ້ສວ່າງ
ສ່ວນວ່າທາງຂ້ອນຍິ້ມ ຫົວເຍີ້ຍເອີ່ຍໃສ່ໃຈ
ແຕ່ແລ້ວສິ່ງຂ້ອຍຄິດໄວ້ ລະເມີຢູ່ໃນສະໝອງ
ຈຳຕ້ອງມາຈົບລົງ ເມື່ອເຈົ້າພຽນຮອຍຍິ້ມ
ເມື່ອເຈົ້າວາຈາຊິ້ມ ໂຊວບົດຮຽນໃຫ້ນາງເດັ່ນ
ພາບທີ່ເຫັນເມື່ອນີ້ ຍິ່ງທຳໃຫ້ຄັ່ງຊວງ
ຂ້ອຍຢາກໄປທັກທ້ວງ ທີ່ເຈົ້າກ່າວລຳອຽງ
ໃຫ້ເປັນສຽງສະເທືອນຫູ ເຂົ້າໃນສະໝອງເຈົ້າ
ໃຈຄິດຈະໄປເວົ້າ ດັງໆບອກເຈົ້າວ່າ
ສົມຄວນຫວະທີ່ເຈົ້າ ເອົາຄວາມຮູ້ໃຫ້ແກ່ນາງ
ເພື່ອເອົາໄປອວດອ້າງ ໂຊວໝູ່ຢ່າງສົດໃສ
ບໍ່ລະອາຍໃຈບໍ ທີ່ເຮັດລົງແນວນີ້
ໂດຍທີ່ມີສັກສີເຈົ້າ ທຽມນາງໂຊວອວດໝູ່
ໂດຍເອົາຄວາມຮູ້ຈາກເຈົ້າ ໄປອ້າງອວດຄູ
ອວດທັງໝູ່ຄູ່ພ້ອມ ເປັນຄົນເກັ່ງໃນສາຍຕາ
ຂອງຄູບາອາຈານ ໝູ່ນັກຮຽນໄດ້ເຫັນຮູ້
ຢູ່ເບື້ອງຫຼັງຄືເຈົ້າ ເປັນຄົນທຳໃຫ້ນາງເດັ່ນ
ໃຫ້ກາຍເປັນຜູ້ເກັ່ງກ້າ ວິຊາລ້ຳບໍ່ຕໍ່າໃຜ
ຮູ້ບໍ່ໃຈຂ້ອຍຮໍ່າໄຫ້ ເຫງົາງ່ວມສຸດແສນ
ເສັ້ນທາງກາຍເປັນແຟນ ຄູ່ຄຽງຕົວເຈົ້າ
ເປັນເສັ້ນທາງທີ່ເຮົາຕ້ອງ ບັນທອນໃຈຢ່າງມາກຍິ່ງ
ເມື່ອເຫັນຍິງອື່ນນັ້ນ ພວມກັ້ນກີດເຮົາ
ໃນຫົວໃຈຮູ້ສຶກເສົ້າ ມາກຍິ່ງເຫຼືອຄະນາ
ເມື່ອເວລາເຫັນນາງ ຍິ້ມສົ່ງລົງມາຫາເຈົ້າ
ຫຼັງຮັບເອົາຂອງຂວັນແລ້ວ ລົງເວທີຍັງຍິ້ມຕໍ່
ນາງຍ່າງກາຍມາມໍ່ຂ້ອຍ ຈຶ່ງຈາເວົ້າໃສ່ນາງ
ດ້ວຍທ່າທາງເຮັ່ງຮ້ອນ ” ເຈົ້າກໍ່ເກັ່ງຄືກັນເນາະ ”
ພ້ອມປ່ອຍສຽງຫົວເລາະ ອອກມານິດໜ້ອຍ
ແລ້ວຈຶ່ງສອຍຄຳເວົ້າ ຫວານໆໃຫ້ເຂົ້າທີ່
” ມີຜູ້ບ່າວແກ້ໃຫ້ນີ້ ສຳພໍແລ້ວຈຶ່ງເກັ່ງໜໍ ”
ນາງບໍ່ຈາກ່າວເວົ້າ ຕອບຕໍ່ຈັກຄຳ
ແລະບໍ່ທຳກິລິຍາ ສິ່ງໃດກັບຂ້ອຍ
ນາງຄ່ອຍລີລາຍ້າຍ ເຖິງເຂົາແລ້ວເວົ້າຕໍ່
” ຂ້ອຍບໍ່ເອົາຄວາມຮູ້ເຈົ້າ ” ນາງເວົ້າໃສ່ເຂົາ
ສິ່ງນັ້ນຍິ່ງເຮັດໃຫ້ເຈົ້າ ອ້ອນອິ່ນນາງນັກ
ເໝືອນດັ່ງເປັນຄົນຮັກ ອິ່ນອອຍຄອຍໃກ້
ຄອຍເອົາໃຈນາງໃຫ້ ເຊົາງອນໂດຍງ່າຍ
ສາຍຕານາງແນມຕໍ່ຂ້ອຍ ທັງຈາອ້ອນຕໍ່ເຂົາ
ເຮັດໃຫ້ຕົວເຮົານີ້ ເສຍໃຈຕໍ່ຕົນເອງ
ທີ່ກ່າວວາຈາຄຳ ໃສ່ນາງສັນນັ້ນ
ຍິ່ງເຈົ້າຫັນຈາເວົ້າ ອອຍນາງຢ່າງສິ້ນທ່າ
ດວງອຸລາຂ້ອຍນີ້ ມັນແຮງດີ້ນສັ່ນເຊັນ
ບໍ່ຢາກເຫັນພາບເຫຼົ່ານັ້ນ ທີ່ມັນບັ່ນຄວາມສຸກ
ຄວາມສະໜຸກຂອງຫົວໃຈ ທີ່ຂ້ອຍມີໃຫ້ກັບເຈົ້າ
ຂ້ອຍຈຶ່ງເອົາຄວາມຮູ້ ໂຊວຄືນເມື່ອໄດ້ທ່າ
ພ້ອມທັງຍິ້ມອອກໜ້າ ຕາງອ້ອນໃສ່ເຂົາ
ແຕ່ພາບເຮົາເຫັນນັ້ນ ຍິ່ງເກີນກວ່າໃຈເຮົາຄິດ
ຄວາມໃກ້ຊິດຂອງເຂົາສອງ ຍິ່ງຜູກພັນສະໜິດໃກ້
ເຮັດໃຫ້ຈິດໃຈຂ້ອຍ ຄອນແຄນແໜ້ນອັ່ງ
ຄິດວິທີຫວັງໃຫ້ເຈົ້າ ຫຼົງເຮົາພີ້ກວ່ານາງ
ແນວຄິດເຮົາເລີ່ມສ້າງ ຫາທາງໄຕ່ເຂົ້າໄປຫາ
ສ້າງເວລາກາລະ ເພື່ອພົບເຂົາໃຫ້ມັນໄດ້
ຈະເປີດໃຈໄຂເວົ້າ ເອົາຄວາມຈິງໄປບອກວ່າ
ດວງອຸລາຂ້ອຍນີ້ ໝາຍປອງເຈົ້າຢ່າງແນ່ໃຈ
ຂ້ອຍຈະທຳທຸກຢ່າງໃຫ້ ເຈົ້າຍອມຮັບໃນຕົວເຮົາ
ຈົນເຈົ້າເຊົາຄິດເຖິງນາງ ເມື່ອເຮົາຊິດໃກ້
ໃຫ້ຫົວໃຈຂອງເຈົ້າ ໝາຍປອງເຮົາຢ່າງແນ້ວແນ່
ໃຫ້ເກີດເປັນຮັກແທ້ ດວງໃຈໝັ້ນຕໍ່ກັນ
ໃຈຂ້ອຍຝັນໄຝ່ໄວ້ ເສັ້ນທາງແຫ່ງຄວາມສຸກ
ຄວາມຜູກພັນຫົວໃຈ ບໍ່ອາດມີໃຜກັ້ນ
ທຸກວັນມີຮອຍຍິ້ມ ສົດໃສດ້ວຍໃຈຜ່ອງ
ມີພຽງສອງເຮົາມຸ່ງໝັ້ນ ວິມານຟ້າສະຫງ່າໃຈ
ຂ້ອຍແນມໄປເບິ່ງເຈົ້າ ເຫັນລຸກຍ່າງເດີນໜີ
ຍ່າງຈາກ ສຸມາລີ ອອກໄປໄກແລ້ວ
ໃນແວວຕາຂອງຂ້ອຍ ແນມເຫັນໂອກາດວ່າ
ເຖິງເວລາໄປວ່າເວົ້າ ເຈາະຈີ້ມສິ່ງຖາມ
ຂ້ອຍບໍ່ອາດຫັກຫ້າມ ເມື່ອໄປມໍ່ ສຸມາລີ
ຈຶ່ງກ່າວຈາວາທີ ຢາກຮູ້ນາງເປັນໃຜແທ້
ຄົນດູແລຊິດໃກ້ ຄົນເອົາໃຈທຸກເຊົ້າຄໍ່າ
ຫຼືເປັນພຽງເພື່ອນຫຼິ້ນ ຮຽນຮູ້ຮ່ວມກັນ
ຮູ້ສຶກວ່າສອງເຮົານັ້ນ ລົມກັນຢ່າງສຸກສັນ
ເຖິງວ່າມີບາງອັນ ກະແທກໃຈອະໄພໄດ້
ເຮັດໃຫ້ໃຈຂອງຂ້ອຍ ມີຄວາມຮູ້ສຶກວ່າ
ເຮົາບໍ່ໜ້າຄິດຮ້າຍ ອິດສາໃຫ້ໃສ່ນາງ
ຈິດໃຈນາງສ່າງກວ້າງ ເກີນກວ່າເຮົາຄິດ
ຫຼືອາດປິດຄວາມຈິງ ເຊື່ອງເຮົາກໍ່ເປັນໄດ້
ແຕ່ວ່າໃນເວລານັ້ນ ເຮົາພໍໃຈມາກກວ່າ
ເພາະວ່າໂອກາດເຂົ້າ ຫາເຂົານັ້ນໄດ້ສໍ່າກັນ
ນາງບໍ່ໄດ້ກີດກັ້ນ ຍິງອື່ນຈາກຕົວເຂົາ
ນາງອາດຈາຕົວະເຮົາ ຂ້ອຍຄິດໃນໃຈໄວ້
ຂ້ອຍຄິດຫາທາງໄຂຂໍ້ ຄວາມຈິງທີ່ຊ້ອນຢູ່
ຮູ້ສຶກວ່ານາງຮັບຮູ້ ເລ່ກົນຂ້ອຍຫຼອກນາງ
( ຂໍອະໄພ ຍັງປັບປຸງຢູ່ ເລີຍບໍ່ໄດ້ລົງໃຫ້ສຸດຕອນ )
No comments:
Post a Comment